दाङ, असार १७ – घोराहीस्थित ज्वालादल गण ब्यारेकका मेजर टेकराज जोशीले मिड वेस्ट प्वाइन्ट एकेडेमीका विद्यार्थीहरूलाई Improvised Explosive Device (IED) अर्थात् अस्थायी विस्फोटक उपकरण सम्बन्धी विशेष प्रशिक्षण प्रदान गर्नुभएको छ। सुरक्षा सचेतना अभिवृद्धि गर्दै विद्यार्थीहरूलाई आपतकालीन अवस्थाको सामना गर्न सक्षम बनाउने उद्देश्यले आयोजित उक्त प्रशिक्षणमा विद्यार्थीहरूले उत्साहपूर्वक सहभागिता जनाएका थिए।
प्रशिक्षणका क्रममा IED भनेको के हो, यस्ता विस्फोटक उपकरणहरू कसरी तयार पारिन सक्छन्, तिनबाट हुन सक्ने जोखिम, शंकास्पद वस्तु वा सामग्री कसरी पहिचान गर्ने, त्यस्ता वस्तु देखिएमा के गर्ने र के नगर्ने, सुरक्षित दूरी कायम गर्ने तरिका तथा सम्बन्धित सुरक्षा निकायलाई कसरी र कहिले सूचना दिने भन्ने विषयमा विस्तृत जानकारी दिइएको थियो। विद्यार्थीहरूलाई वास्तविक जीवनमा आइपर्न सक्ने जोखिमपूर्ण अवस्थालाई सुरक्षित रूपमा सामना गर्ने उपायबारे पनि व्यवहारिक रूपमा प्रशिक्षण प्रदान गरिएको थियो।
प्रशिक्षक मेजर टेकराज जोशीले सुरक्षा सचेतना नै दुर्घटना न्यूनीकरणको पहिलो आधार भएको उल्लेख गर्दै कुनै पनि शंकास्पद वस्तु वा सामग्रीलाई चलाउने, खोल्ने वा सार्ने प्रयास नगर्न आग्रह गर्नुभयो। उहाँले त्यस्ता वस्तु फेला परेमा आफू सुरक्षित स्थानमा रही तत्काल प्रहरी, नेपाली सेना वा सम्बन्धित सुरक्षा निकायलाई जानकारी गराउनुपर्नेमा विशेष जोड दिनुभयो। समयमै अपनाइएको सावधानीले सम्भावित मानवीय तथा भौतिक क्षति रोक्न महत्वपूर्ण भूमिका खेल्ने उहाँको भनाइ थियो।
उहाँले विद्यार्थीहरू भविष्यका जिम्मेवार नागरिक भएकाले सुरक्षा सम्बन्धी आधारभूत ज्ञान विद्यालय तहदेखि नै आवश्यक रहेको बताउनुभयो। यस्ता प्रशिक्षणले विद्यार्थीहरूमा सचेतना, अनुशासन, जिम्मेवारीबोध र विपद् तथा आपतकालीन अवस्थाप्रति सही सोचको विकास हुने विश्वास व्यक्त गर्नुभयो।
प्रशिक्षण कार्यक्रममा विद्यालयका प्रधानाध्यापक वीरबहादुर घर्ती, विद्यालय व्यवस्थापन समिति अध्यक्ष सुबोध डाँगी, शिक्षक–शिक्षिका तथा विद्यार्थीहरूको उल्लेखनीय सहभागिता रहेको थियो। कार्यक्रममा सहभागीहरूले यस्ता व्यवहारिक तथा जीवनोपयोगी प्रशिक्षणले पाठ्यपुस्तकको ज्ञानसँगै व्यवहारिक सीप हासिल गर्न सहयोग पुग्ने धारणा व्यक्त गरेका थिए।
विद्यालय प्रशासनले पनि नेपाली सेनाले सञ्चालन गरेको यस्तो कार्यक्रम अत्यन्तै उपलब्धिमूलक रहेको जनाएको छ। विद्यालयमा अध्ययनरत विद्यार्थीहरूलाई सुरक्षा सचेतना, विपद् व्यवस्थापन र जिम्मेवार नागरिकका रूपमा विकास गर्न यस्ता कार्यक्रम प्रभावकारी हुने विश्वास विद्यालयको छ।
नेपाली सेनाले पछिल्ला वर्षहरूमा विद्यालय, कलेज तथा समुदायस्तरमा सुरक्षा सचेतना, विपद् व्यवस्थापन, उद्धार तथा जनचेतनामूलक कार्यक्रम सञ्चालन गर्दै आएको छ। यस्ता कार्यक्रमले विद्यार्थी र समुदायबीच सुरक्षा संस्कृतिको विकास गर्नुका साथै नागरिक र सुरक्षा निकायबीचको सम्बन्धलाई अझ मजबुत बनाउन महत्वपूर्ण भूमिका खेल्दै आएका छन्। मिड वेस्ट प्वाइन्ट एकेडेमीमा सम्पन्न यो प्रशिक्षण पनि त्यसै अभियानको एक महत्वपूर्ण कडीका रूपमा हेरिएको छ।
