दाङ । नेपालको शिक्षा क्षेत्रलाई अन्तर्राष्ट्रिय स्तरमा चिनाउने उल्लेखनीय उपलब्धि हासिल गर्दै ज्ञान ज्योति फाउन्डेशन ले Greenwich University, UK र College Readers Nepal को संयुक्त आयोजनामा सम्पन्न Nepal–UK Education Award 2025 कार्यक्रममा ‘Prominent College of the Year 2025’ को सम्मान प्राप्त गरेको छ।
लन्डनमा सम्पन्न उक्त भव्य समारोहमा नेपालका विभिन्न प्रतिष्ठित शैक्षिक संस्थामध्येबाट ज्ञान ज्योति फाउन्डेशनलाई शैक्षिक उत्कृष्टता, संस्थागत पारदर्शिता, र विद्यार्थी–केन्द्रित शिक्षण प्रणालीका आधारमा चयन गरिएको हो।
कार्यक्रममा विश्वविद्यालयका प्राध्यापक, नेपाली दूतावासका प्रतिनिधि, शिक्षाविद् र अन्तर्राष्ट्रिय शैक्षिक सरोकारवालाहरूको उपस्थिति रहेको थियो। सोही अवसरमा आयोजक समितिले फाउन्डेशनको नवीनतम शैक्षिक अभ्यास र सामाजिक उत्तरदायित्वमा आधारित योगदानलाई उच्च सम्मानका साथ प्रशंसा गरेको थियो।
फाउन्डेशनले विगत लामो समयदेखि विद्यार्थीलाई “Education Beyond Textbook” भन्ने अवधारणामा आधारित शिक्षण पद्धति अपनाउँदै आएको छ।
व्यवहारिक सीप, अनुसन्धान, र सामुदायिक सहभागितामार्फत विद्यार्थीको सम्पूर्ण क्षमता विकासमा जोड दिएको यस संस्थाले देशमै गुणस्तरीय शिक्षाको नयाँ मापदण्ड स्थापित गरेको मानिन्छ।
फाउन्डेशनका प्रतिनिधिले अवार्ड ग्रहणपछि प्रतिक्रिया दिँदै भने —
“यो सम्मान केवल हाम्रो संस्थाको होइन, सम्पूर्ण नेपाली शिक्षा क्षेत्रको गौरव हो। हामीले स्थानीय स्तरमै बसेर पनि अन्तर्राष्ट्रिय स्तरको शिक्षाको उदाहरण प्रस्तुत गर्न सकिन्छ भन्ने प्रमाणित गरेका छौँ।”
Nepal–UK Education Award 2025 का आयोजकहरूले फाउन्डेशनलाई नेपालको ग्रामीण क्षेत्रबाट समेत गुणस्तरीय शिक्षा विस्तारमा अग्रणी भूमिका निर्वाह गरेको भन्दै विशेष प्रशंसा गरेका थिए।
उनीहरूका अनुसार, फाउन्डेशनले शिक्षालाई सामाजिक रुपान्तरणको माध्यम बनाउँदै विद्यार्थीमा नेतृत्व र नैतिकता विकासका लागि अनुकरणीय योगदान दिएको छ।
कार्यक्रममा सहभागी शिक्षाविद्हरूले यस अवार्डलाई नेपालको शिक्षा क्षेत्रका लागि उत्साहप्रद सन्देशका रूपमा लिएका छन्।
